لست وحدك في الملجأ

بهاي التجربة شفنا شغلة غريبة: لما حطّينا الميّ السخنة فوق الميّ الباردة – ما اختلطوا تقريبًا! بس لما بدّلنا – يعني، الميّ الباردة فوق، والسخنة تحت – كل إشي اختلط بسرعة. ليش؟ السبب هو الفرق بالكثافة بين الميّ الباردة والميّ السخنة. الميّ الباردة جزيئاتها قريبة من بعض ومرتّبة أكتر، والكثافة تاعتها أعلى. بس لما الميّ بتسخن، الجزيئات بتتحرّك أكثر، بتبعد عن بعض، والكثافة بتقلّ. وعشان هيك – لما الميّ الكثيفة (الباردة) تحت، والميّ الخفيفة (السخنة) فوق – بيضلّوا بمكانهم، وما بيصير خلط كبير. بس لما نحط العكس – الميّ الخفيفة تحت، والثقيلة فوق – الميّ بتتحرك وتتداخل، لحد ما تصير نفس الحرارة... ونفس اللون كمان!

من خلال هذه التجربة، قدرنا نتعرّف على ظاهرة اسمها "توتر السطح". يعني، سطح الميّ بتصرف بطريقة مختلفة عن الميّ اللي من جوّا – وبيصير عليه زي غشاء خفيف، وكأنّه في طبقة رقيقة بتحافظ على شكل الميّ. هالغشاء بيتكوّن لأن جزيئات الميّ بتمسك ببعضها بقوة، أكتر من تمسّكها بالهواء اللي حواليها. فبيضلّوا قريبين من بعض، وبيشكلوا "توتر" على السطح. لما نقطّر ميّ على عملة، منشوف كيف القطرات تتراكم وبصير في قُبّة صغيرة من الميّ، وكأنها قاعدة "تتوازن". لكن مع الوقت، ومع كل نقطة زيادة، بيزيد الوزن – وبيجي لحظة اللي فيها الوزن بغلب القوة اللي ماسكة الجزيئات مع بعض – وبس تنكسر هاي التوازن، بتنفرط القبة وبتنسكب الميّ.